Tout jé apa jé
Ponmoun pa
tini dwa
Fè jé èvè on péyi
Menm jan
Ponmoun pa tini dwa
Jwé jé bésé èvè on pèp
Sé toujou èvè
vou menm ou ka fè jé
Sé toujou vou menm ou ka kouyonné
Mwen menm
Mwen las jwé jé lasa
Two lontan
Mwen rèsté two lontan
Ka jwé
Ka éséyé fè moun konpwann yo tini on péyi
Menmjan dôt moun ka pwan chimen révolysyon
Ki an finaldikont
Toujou ka avôté
Jôdijou
Mwen la
Ka gadé péyi-la
Konsidiré sé on pyès siléma
Èvè on lo aktè adan on dékorôm a pyès kôrbôy
Kon timoun ki bokanté joujou
Péyi-jwé
Péyi-joujou
Péyi-pliché
Dékatchyé
Men vid
Voras
Tousèl
Péyi-la ka brilé
Kon difé toufé anba sann
Mé ki toujou paré pou voyé flanm
Lè’w ka tizonné’y
Péyi-la paka
jwé
É magrésa
Sèk an fè a
bari
Timoun ka pousé an lari
Bay désann ka woulé si kô ay
Van a libèté
Ki ka fè sèvolan monté
Souflé si’y chak fwa y té ka toufé
Fanm a
kolyéchou grenndô
Ki ka chayé pannyé si tèt a yo
Plen èvè tousa péyi-la ka pôté
Son a fwi a
maoganni
Ki ka wouvè
Épi ki ka ladjé
Ti fèy ki ka toubiyonné an van
Chwi-chwi
an gwolannuit
A krab aristokrat
Ki paka nôz pozé pwent a pat
Si sab obôdlannè
Zwèl séré a
nyaj èk solèy
Lonbraj épi klèté
Ka jwé koukou-dèdè
En plen mitan syèl blé
Di
yo !
Mé kriyé sa péyi !
An zôrèy a nouvo konkéran sôti jis lôtbô
Ki rivé an zantray a zozyo
zèl an fè
Di yo lèldorado a pa a kaz
an nou
Mé di sé lé zôt-la osi
Ki’w pa sèlman
Moun ki ka travay tè
Piti travayè a piti lajan o mwa
Tranglé
Ki tanzantan
Ka désann
Pou déboulé an tout lari
Pankat an men a yo
Ka ba’y lavwa si mizik
politik
Konsidiré yo té Pari…
Lôtbô !
Di
yo !
Mé kriyé sa !
Tout glas a
vitrin a la fwans karayb
Ja pété an dis mil môso !
Palé ba
yo !
É di sé lézôt-la
Avan lèsklavaj
Avan nèg mawon
Avan zendyen
Avan sentwa
Liban
Bétché
Ek blan
Avan
Lwen
Pi lwen
Lwen lwen lwen douvan
An bout a lenfini
Ou té ja la, péyi !
Di
yo !
Mé kriyé sa !
An lo fanm a
péyi-la
Mofwazé an kabann lanmou
Ola lajan dola ka kouché si vant a yo
Mé
Di sé lé zôt-la osi
Fanm a péyi-la
A pa tou di bouden plenn chak lanné
Kon machin pou fè timoun
Péyi-la
arèsté chanté !
É magrésa !
Y chanté lanmou
Si mizik a dlo lapli
Ki ka tonbé si fèy tôl a vyé kaz
Pou chayé timoun é ba yo landômi
Mizik
Konsidiré sé té kôd a gita
Y chanté la
vwa égal
Pou ba lanmô répons an véyé boukousou
Jou a gwo
lapli
Y té ka mofwazé dlo a kannal Vatab
An larivyè pou timoun, ajounou, fès an lè
Pé péché golomin an lodè a dlo sal
Di
yo !
Moun bèl konplé, bèl rôb é bèl soulyé
Ki ka fè gwan diskou adan diné-déba
Èk ki ka palé dè moun ki ka mô fen
An tout kwen si latè
Di
yo !
Nou té ké enmé vwè
On fwa
On sèl fwa
An machann pwason
Poutchi pa
Sizé an koumbit a fanm
Ki ka pasé an jounal, radyo épi télévizion
An nou arèsté
fè jé !
Mé kikalité
modèl péyi nou tini la ?
On lo môso
boul kracha nwè
Ki ka pwézonné grenn sab
Si plaj ola vag a lanmè ka vin mô
Chyen anrajé ka mèt dan a yo lablanni
Pou môdé tout kô a péyi-la
Chak moun vlé
on môso
Chyen èvè kat
idantité
Chyen èvè lès é kolyé
Chyen ka drivé san lès, san
kolyé
Chyen a fizi paré pou pété
Chyen kouché kon chyen a fizi
Chyen véyatif a kan patriotik
Chyen kolonyalis
Péyi-la pa ka
ri ankô !
Mé magrésa !
Y
toujou té ka ri
Zyé a dimi fèmé
Douvan maché a fanm
Adan an mi taw mi tan mwen
Ki ka fè nonm pèd la kat
É anba gôj a zandoli
Ki ka maché si pwent a pat
An bèl majôl jôn ka gonflé
Pou fè tout fimèl zandoli
Kouri dèyè yo
Péyi-la ka
chanté
Anki léwôz plen mélankoli èk tristès
É vwa a sé chantè-la
Izé èvè ronm
Ka chanté
Anki fondè a gwolannuit
Lannuit a kout baton
Lannuit a kout fwèt
Lannuit a jaré koupé
Lannuit a zyé ki ka pléré
Apré gaz lakrimogèn èsplozé
Lannuit a kô dékatyé pa manblo on jou a gaoulé
Mé magrésa
Lannuit a lèspérans
Nou tini dwa
révé
Fè tout lilèt la karayb opiyaj
Lyanné adan an sèl mouvman
An gwan soup a kongo
Anglé, pannyôl, fransé, kréyôl
Nou tini dwa
révé !
Mé penga
klèté a lalin plenn ka fè’w kwè
Réyon ay ké pé ba’w chalè
É kri aw
Pèd an gwan loséan a moun ki vlé pa tandé ak
Péké jenmen krévé
Silans a gwolannuit
É
toupandansitan
Lagangrenn
ka trasé chimen a’y
An tèt a moun ki ka pèd fil a yo
Épi ki ka néyé lèspri a yo
an ronm
Lagangrenn ka
bouré !
An jénès pedfil ka vin pawo
An lafimé a zèb, lapoud èk
rôch
Ka chèché, sans touvé’y
Bout a chimen lavi
Lagangrenn
ka foyé !
Kon an gwan bobo wouvè
Ki ka kriyé anmwé !
Gwan
chirijyen-la rivé !
Pou ba moun landômi
Ka woté an môso pa-isi
Ka woté an dôt môso pa-la
Ka woté an sèrvèl
Ka mèt an dôt an plas a’y
Ka koupé an tèt
Dé tèt
Twa tèt
Opérasyon-la
bout !
An nouvo nonm
Prôp
Nèf
Tou nèf !
Pa rélé, o
péyi !
Pa di yo ak !
Kriyé
volkan-la !
Envité siklôn-la an bwè é manjé-la !
Konvyé razdimaré pou’y nétoyé tousa !
Kriyé tranblad a latè
Pou’y krazé sa’y tini pou krazé
É nou tout
Ansanm ansanm
An nou kriyé an djèl a solèy-la
An ki jan lilèt-la ka santi’y tou sèl !
Alain
Phoebé Caprice
29/03/07
|
