|
Péyi'w 'la !
Tout
pawòl ki palé.
Tout
kont konté,
mi yo an
tè'w menm
kon
vérité an bouch a gadé-zafè.
Péyi'w
'la !
Koulé
a péyi la ka bay bal
adan
dé lanmen mwen.
An la
kon doktè
ka
kouté tout lodè
ka
monté an kè péyi-la.
Tout bwi
péyi-la
ka vin
di mwen bonjou
kon
dé vyé zanmi.
Péyi
nou an !
Ban mwen
wè'y épi zyé bidÿoul mwen.
Ban mwen
kouté'y épi zorèy bidÿoul mwen.
Ban mwen
santi'y bat épi kè bidÿoul mwen.
Fout i
ka sanm ou !
Zékim
ka bay lavwa
pou gwan
kont lanmè-a.
Voklen !
ou
sé di on bèl grap an pyé bwa lanmè-a.
Gadé
sé péchè-a,
dodin
lanmè a an ren yo
ka
chiktayé mizè an poch yo.
Apwè
yo suiv tras zétwal,
apwè
yo ripasé lanmè a kon vyé rad
yo kay
pwan on sèk.
zyé
yo pann an cloché légliz-la
konsidéré
bousòl pou chimen déviré.
Ou
sé di men yo sé dé pwason
oben
dé bel honma.
Gadé
sé péchè-a !
Ou
sé di sé bondyé
ka ba
lé méritan on bel lòsti-pwason.
Machann
pwason rélé,
vwa yo
asou chouval van-an
ka kouri
jik an savann soufwans.
Pa
blyé masonn an...
I di sa
lanmè té tini an fon kè'y.
Sa ki
yòl ?
lanmè-a
di
sé
on pé pou ki ka graté pwèl chyen blé
lanmè-a
Sa ki
yòl ?
sé
péchè-a di
sé
chouval pa menm van pa ni lafòs menné.
Sa ki
yòl ?
van an
di
sé
nam karaib ka volé an syèl dlo.
Sa ki
yòl ?
On
nèg di
ou
sé di on bèl bagay fanm
gwan
ouvè an dé janb lanmè-a
Sé
désann i ka désann
an
lè dousin blé a
Pa di sa
pa vwé !
Sé
masonn an ki di'y !
Pa
blyé masonn-an !
Mi La
Pwen Fola.
Bwet a
krab sé fanmiy.
On fanm
rélé anmwè.
Rélé
la ka sotti
jik an
fondòk lafrik
Ay
Mondyé ! Pityé ! Mizérikòd !
Bwèt
a krab za fenmé
i ka
véyé an lòt...
On
payòt ka toufé
doulè
malérez-la
On
payòt ki majò.
Mizik li
dézodyè, mizik li sé kenbwa
tout
jennès ozabwa.
kenbwa
fès.
kenbwa
kè.
Lafoukaka
koupé gwo gato lannuit-la.
Fanm ka
poté kòyo.
Fanm ka
viv kòyo.
Fanm ka
swè
yo ka
brennen lannuit
jik tan
yo dékatyé'y.
Mi
Makabou.
Dèyè
dé-ou-twa bèl kaz
lanmè-a
ka gonflé bajòl,
ka
karé kòy paré pou on lagya.
Pyé-rézen
menm pwan lavòl.
Varèk
pwofité pwan dousin
pandan
sab ka benyen.
Anbabwa
ka valé fiyansé
pi vit
ki zandoli ka varé nenpot mouch.
Lésé
yo pwan plézi.
Mi
lanmontangn Voklen !
zorèy-li
gwan ouvè
pou tout
zosyo lanmè ponn on bel chanté.
Tout
sé kay-la fenmé
pi
fenmé ki tonbo.
Tout
sé kay-la krazé
yo ka
ralé kat pat.
Désann
lavil ba yo lèspwa mal-papay...
pyé
bwa ka navigé
adan on
nich sèpan anrajé.
Montangn
la défwéné,
ka
monté, ka désann
a lez
kò'y.
I
filé lé dé bo. Difé loubli vanté.
Janden
an tan lontan
pwan
vèglaj a kenbwa jodijou.
Lan
montangn Voklen,
on sel
chicklet pyébwa épi tè,
ka
bwè tousa lanmè a pé baye ouè
dépi
nou di nou swef.
Bodlanmè
ka fété'y.
Li menm
pa jen lésé nou mo fen.
E poutan
féyaj li pwan lenbé.
Pawòl
li ka volé an syèl tan lontan
avan i
pozé kon lonbraj an silans.
I pa jen
lésé nou mo fen.
Jan tan
lontan
Jan lan
montangn
serkeye
ja paré pou dényé pawòl zot
pou
dényé rimèd razié
pou
dényé salézon lespwa zot.
Voyé
zié !
bagaye
yo ka dézerbé tout mon, tout santié.
Jan
lan montangn
nou ka
viré ti-manmaye
lè
nou ka sonjé zot.
sonjé
zot té wè nou.
Voklen !
péyi
nou an.
an ka
bo'y asou bouch
é
fwison ka pwan mwen.
Anni
gadé difé karem an zèb-a
anni
gadé lapo ou
sé
menm bagay !
Tout
chivé sé tuil-la ka pwan koud pengn van-an.
Solèy
mété difé
asan
tèt lanmè a.
Voklen
Péyi
nou an !
Sétoudi
rèspiré on bèl lansan lanmè.
Wonm la
ka bat lam li
anlè
sé bivèt-la.
Pawòl
ka fè doba
avan i
désann an vil malpalé.
Péyi
nou an.
I ni gou
lachè'w !
chak
wòch di rété
zétwal
konfirmé.
Annou
ouvè jip plisé lanmè-a
asou
plaj-la.
annou
ouvè dé janm lannuit-la
asou
plaj-la.
San pon
lenj
kon
bondyé fè nou
Po an
nou asou zèb
kè
an nou pwan lavòl
abo
lalin plenn
San pon
lenj
ka
rélé lalin plenn
anlè
difé an nou
é
difé a vòlkan
an
twanblad a tété'w
Ernest
Pépin
|
