Bondié sé kon Kwafè !

Sé on nomm ki kay an vil vwè on kwafè pou koupé chivé a'y é tayé bab a'y ongran sanmdi maten.

Toupannan kwafè-la ka koupétayé, yo koumansé on bon ti palé. Aprédavwa yo fè lantou a tout laktialité, yo rivé a palé di... Bondié, gran Met-la.

Pengn é sizo an men ka fè klik tak, klik tak, kwafè-la di nonm-la konsa :

- An pa ka kwè ni pon diab Bondié ka egzisté !
- E pouki ou ka di sa, on ? nonm-la réponn-li.

Kwafè-la soukré sizo-la pou fè chivékoupé tonbé, é i di nonm-la :

- Ou ni ka alé an la ri-la, é ou ké vwè bien pani mèwd Bondié. Dimwen ti bren, si té ni on Bondié, téé tin tou sa moun malad? Tou sa ti moun san kaz, san fanmi, é san manjé? Tou sa moun an mizè? Kouté mwen bien, si sé té vré té tin on Bondié, ében pon-on moun pa téé ka soufè konsa! An pépa kwè on Bondié ki enmé nou pé ka permet tou sa ! Aawa !

Klian-la réfléchi on bon moman, manton an men é men si manton... Mé i pa réponn tousuit, pou pon bab pa lévé, é osi pou kwafè-la pa ped kontrol a sizo-la é flangé lob a zorey a'y fap !

Lè'w vwè kwafè-la fin, nonm-la péyé, i pran monné a'y, é i pati an lari-la.

Avwala ka i ka vwè, on boug a gran chivé long é an pangal ka trenné an vil, ek on gran bab tou sal an figi a'y.

Lè nonm-la vwè sa, i kouri rètouné aka kwafè-la, i kenbé zépol a'y, i gadé'y an zié, é i di'y konsa :

- Es ou sav on biten, tou kwafè ki'w yé ?... Eben kwafè,... sa pa ka egzisté !
- Kouman fè ou ka di sa ? An sé on kwafè, an la douvan'w, an manm a sendika a kwafè dèpi venndé zan, é sé bien mwen ki téka koupé chivé a'w toutalè-la, non ! On moun di'w travay-la pa bien fet ?

- Aawa, kwafè ! Ou ka révé tou doubout ! Pani kwafè si La Tè ! Kouté mwen bien, si té tin kwafè, pa téé ni pon moun sal a gran chivé long é bab sal an lari-la, kon misié, mi, gadé déwo-la !

- Aaa, wi, pou ni moun a chivé sal é gran bab, a pa yonndé selman ki tini... Mé sa vé pa di pa tini kwafè ! Sé moun sal-la sa, sé yo ki paa vin vwè nou !

- Eben vwaala, palé annou-la rivé bout !  Pou Bondié, sé menm biten-la. Bondié la, é i ka egzisté, i prézidan a vi a Sendika a lé Sen ! Mé sé sé moun a pwoblem-la ki pa a chaché'y, sé yo ki pa a rapwoché di'y !

E mi sé pou sa tin tann doulè é tann soufrans a si La Tè ki an ba Siel !!!

Lévé pisé !  On krey ti fab an karu-kréol.