 |
|
Pwofitokrasi
 Nouvo konsèp pou
pale sou nouvo reyalite kap vale teren.
Reyalite 1 Kòm kanmarad la te di: chak tan pou chak choz. Sa vle di limanite kon lasyete pa rete anplas, li gen mouvman. Dekouvèt lamerik te fè gen lesklavaj nwa kote blan eropeyen se te mèt ki tap koumande. Twa rezon majè te eksplike sa : 1) Siperyorite mwayen pwodiksyon blan te genyen sou nwa 2) Kwayans nan siperyorite rasyal, blan siperyè nwa 3) Peyi afriken yon te blonjè nan guè sivil, yonn tap dechire lòt, yo tap viv chen manje chen. Divizyon fè zafè mouche blan konsa mesye blan tou pwofite antre nan jwèt la. Reyalite 2 Avèk endistriyalizasyon ki te libere kapitalis ak kwayans nan demokrasi (libète, egalite, fratènite), se konsa lesklavaj te vin aboli. Sèl pèp ayisyen ki te fè laguè pou te vin gen lendepandans. Sa te rive fèt sitou paske endistriyalizasyon te vin pi rentab, te bay plis pwofi ke lesklavaj. Demokrasi te jwe yon gran wòl tou nan liberasyon sa a paske moun yo te kwè nan potansyalite tout ras, kwè nan egalite chans ki te ranplase ansyen rejim nan ki te chita san. Rasanble miltipliye byen richès ak echanj entènasyonal te rann tout sa posib. Reyalite 3 Endistriyalizasyon te fè gen ibanizasyon. Ibanizasyon menm te bay masifikasyon sosyete. Kòm rejim kominis te tonbe, kapitalis vin ap fonksyone san presyon, san konpetisyon, san advèsè. Kòm mache travay la vin yon ti jan satire, yo bliye tout pwojè sosyal kit te konn favorize pwomosyon asansyon moun yon an sosyete ya. Se konsa klas moyèn nan kit e prèv tanjib mobilite sosyal vin tonbe plat atè. Se konsa vin rete sèlman de klas : yon klas grandèt ki gen anpil lajan(milyonè), ak yon klas Sòyèt ki gen ladan li mas pèp la. Zafè pwomosyon sosyal pou pòv fini, se kesyon pwofi ki bouch tout dirijan sosyete yo ak kontwòl mas pèp. Reyalite 4 Kwayans nan pwofi siyi pouvwa chita nan pwofi. Se pwofi ki bay pouvwa. Tan demokrasi kote se pèp ki bay pouvwa fini. Koulyeya vox pwofiti, vox dei. Tan ki mache avèk lespri pwofi ya, nou ta ka rele li, milyonaris paske richès ki chita sèlman nan men milyonè ki gen kontwòl sou konsamasyon mas pèp la. Reyalite5 Se pou sa nou blije envante konsèp ``pwofitpokrasi`` pou pale sou nouvèl reyalite sa a kap vale teren. Pwofitokrasi vle di tou ekonomi-politik la chita sèlman sou pwofi. Yo pa bezwen pèp ankò pou bay pouvwa. Demokrasi se pawòl antik. Kòm pwofitè yo fè richès tounen pwogram ki kontwole mas pèp la, yo itilize anpil ajan kontwòl pou rann kontwòl la pi efikas. Nan ajan kontwòl nou kapab jwenn : Leta, lapolis, lajistis, lekòl, legliz, òganizasyon bi likratif. Tout se restavèk, tchoul tisousou maryonèt gran pwofitè yo. Reyalite6 Nan pwofitokrasi moun pa bay moun. Pwofitè manje krase vale tout zo. Menm z opa rete pou chen jwenn. Sa ki pi règ si Sòyèt, gen yon byen richès nan men li, Grandèt pwofitè ap ba wou yon pakala, pou li pran tout. Se yon jwèt lespri kap jwe. Se rena ki nan pouvwa. Pwofitokrasi Sosyete antrave Tout moun tèt mare Koulyeya se yon kesyon pwofi Aktyalite nan tout kwen lari Yon barank divizyon Yon montay eksklizyon Sosyete kay zetaj San pòt san pasaj. Yon gwoup rele òf Yon bann rele demand Yon gwoup rele pwodiktè Yon bann rele konsomatè Yon gwoup rele vandè Yon group rele achtè Konsa sa ki rich vin pi rich Sa ki pòv vin pi pòv Koulyeya se yon kesyon pwofi Yon rèy yo rele pwofitokrasi Pwofitokrasi Mezanmi demokrasi Tounen pwofitokrasi Pwomosyon se pou Grandèt Opresyon se pou Sòyèt Mezanmi demokrasi Tounen pwofitokrasi pozisyon se pou Grandèt represyon se pou Sòyèt Mezanmi demokrasi Tounen pwofitokrasi desizyon se pou Grandèt depresyon se pou Sòyèt Mezanmi demokrasi Tounen pwofitokrasi Pwodiksyon se pou Grandèt konsomasyon se pou Sòyèt Mezanmi demokrasi Tounen pwofitokrasi Privilèt se pou Grandèt Ekklizyon se pou Sòyèt Rich vin pi rich, zafè Grandèt Pòv vin pi pòv, zafè Sòyèt Grandèt pran avyon monte anro Sòyèt pran parachit desann anba. Edner saint Amour |
